काठमाडौँ : अभिनेता नरेन खड्का स्टारर भोजपुरी चलचित्र ‘रण’ को ट्रेलर सार्वजनिक भएको छ । भोजपुरीमा नरेनले दमदार डेब्यू गरेका छन्, चलचित्रको सार्वजनिक ट्रेलरमा यो प्रस्ट देख्न सकिन्छ ।

फरक पहिरन, गेटअप र लुक्समा देखिएका नरेन ट्रेलर भरी छाएका छन् । ट्रे्लरमा पुर्णतः एक्सन प्रधान बनाइएको छ । कोभिड महामारीको बीच छायांकन भएको यो चलचित्रबाट नेपाली अभिनेता खड्काले भोजपुरी डेब्यू गरेका थिए । त्यसपछि उनले अर्को फिल्म ‘माही’ समेत गरिसकेका छन् ।

नेपाली निर्देशक चन्द्र पन्तले यो रण लाई बनाएका हुन् । पन्त पछिल्लो समय भोजपुरीमा जमेका निर्देशक हुन् । उनि ‘ह्रस्व दिर्घ’ बाट नेपाली चलचित्रमा निर्देशनको डेब्यू तयारीमा छन् । चलचित्रमा प्राविधिक तर्फ पनि नेपाली फिल्मकर्मी नै हाबी छन् । शाहिल खानले ट्रेलर तयार पारेका हुन् । चलचित्रमा सम्पादन अर्जुन जिसीको छ ।

निर्देशन पन्तको नै कथा र पटकथा समावेश चलचित्रमा नरेनसँगै आनन्द ओझा, काजल रगवानी, सिपी भट्ट, मनोज टाइगर, देव सिंह लिड अभिनयमा छन् । अरुणकुमार मिश्रले फिल्म निर्माण गरेका हुन् । यो फिल्मको प्रदर्शन मिति भने सार्वजनिक गरिएको छैन ।