काठमाडौं- भारतमा एकै दिनमा ९० हजारभन्दा धेरै कोरोना भाइरसबाट संक्रमित भएका छन् ।

पछिल्लो एक महिना यता हरेक दिन विश्वमै सबैभन्दा धेरै कोरोना संक्रमित थपिने गरेको भारतमा पछिल्लाे २४ घण्टामा ९० हजार ६ सय जनामा कोरोना पुष्टि भएको हो । १ हजार ४४ जनाको मृत्यु भएको छ ।

पछिल्लो २४ घण्टामा अमेरिकामा ४० हजार ७ सय ४८ जना संक्रमित हुँदा ७ सय ७ जनाको मृत्यु भएको छ । ब्राजिलमा ३१ हजार १ सय ९९ जनामा संक्रमण पुष्टि हुँदा ६ सय १९ जनाको मृत्यु भएको छ ।

अमेरिका र ब्राजिलमा भन्दा पछिल्लो एक महिना यता प्रत्येक दिन भारतमा धेरै संक्रमित भेटिने गरेको छ।

यसअघि शुक्रबार भारतमा ८७ हजार ११५ जनामा संक्रमण पुष्टि भएको थियो भने अमेरिकामा ५२ हजार ८ सय ५३ र ब्राजिलमा ४५ हजार ६ सय ५१ जना संक्रमित भएका थिए ।

भारतमा अहिलेसम्म कोरोनाबाट ४१ लाख १० हजारभन्दा धेरै संक्रमित भएका छन् भने ७० हजार ६ सय ७९ जनाको मृत्यु भएको छ ।

सबैभन्दा धेरै संक्रमित र मृत्यु भने महाराष्ट्र राज्यमा भएको छ । जहाँ कोरोनाबाट ८ लाख ८३ हजार ८ सयभन्दा धेरै संक्रमित भएका छन् भने २६ हजार २ सय ७६ जनाको मृत्यु भएको छ ।