५ बैशाख, अछाम |

पञ्चदेवल बिनायक नगरपालिकाले स्थापना गरेको कोरोना भाईरस संक्रमण, रोकथाम तथा उपचार प्रकोप ब्याबस्थापनका लागि बिपद् व्यावस्थापन कोषमा आर्थिक सहयोग जुट्न थालेको छ ।

नगरपालिकाले नगरबाट १० लाख रकम विनियोजन गरि कोष स्थापना पछि अहीले ब्यक्तिगत तथा संस्थागत रुपमा राहत कोषमा आर्थिक रकम जम्मा हुन थालेको हो ।

हिजो मात्रै सुदूरपश्चिम प्रदेश सरकारले नगरको कोरोना भाईरस संक्रमण, रोकथाम तथा उपचार प्रकोप ब्याबस्थापन कोषमा २३ लाख जम्मा गरेको पञ्चदेवल बिनायक नगरपालिकाका नगर उपप्रमुख अम्बिका चलाउनेले बताईन ।

यस्तै बिनायक निवासी हाल काठमाण्डौँमा रहेका नेपाली कांग्रेस महाधिबेशन प्रतिनिधी भद्र बहादुर शाहीले नगरको बिपद् व्यावस्थापन कोषमा ५१ हजार जम्मा गर्नुभएको छ । समाजसेवी शाहीले कोरोना भाईरस संक्रमण, रोकथाम तथा उपचार प्रकोप कोषमा सहयोग पुगोस भन्ने हेतुले आर्थिक सहयोग जम्मा गरेको उल्लेख गर्नुभयो ।

यस्तै नेपाली कांग्रेस अछामका सहसचिव एवं प्रवक्ता बेदप्रकाश तिमिल्सैनाले पनि १० हजार सहयोग गर्ने घोषणा गर्नुभएको थियो । उहाँले नगरलाई तयारी अवस्थामा राख्न पूर्व तयारी अनुसार थालिएको अभियानमा आफुले कोरोना भाईरस संक्रमण, रोकथाम तथा उपचारमा सहयोग पुगोस भनेर रकम जम्मा गर्ने बताउनु भयो ।

यस्तै बिनायकका समाजसेवी जनक बिकले पनि १५ हजार ५ सय ५० सहयोग गर्ने घोषणा गर्नुभएको छ ।

नगरले सबै क्षेत्रबाट नगद अथवा जिन्सी, स्वास्थ्य सामाग्री लगायतमा सहयोगको अपेक्षा राखेकाले नगर उपप्रमुख चलाउनेको भनाई छ ।

साथै उहाँले खाद्यान्न सामग्री वितरणमा दोहोरोपना नपर्ने गरि एकरुपता ल्याउनका लागि एकमुष्ट रुपमा नगरलाई हस्तान्तरण गरि सहयोग गरिदिन समेत आग्रह गर्नुभएको छ ।

देश तथा विदेशमा रहेका हरेक ब्यक्तिले नगरपालिकाको रहेको बिपद् ब्याबस्थापन कोषको मछापुच्छे बैंक विनायकमा रहेको हिसाब नम्बर ८४०१५२४६५२९३६०७९ मा जम्मा गर्न सक्ने नगरपालिकाले जनाएको छ ।