अछाम: जिल्लाको  पञ्चदेवल विनायक  नगरपालिकालाई पूर्ण खोप सुनिश्चितता पालिका घोषणा गरिएको छ ।

‘स्थानीय स्वामित्व र सहभागितामा, पूर्ण खोप सुनिश्चितता हाम्रो प्रतिबद्धता’ भन्ने नाराका साथ आइतबार नगर सभा समापन संगै पूर्ण खोप सुनिश्चितता पालिका घोषणा गरिएको हाे ।

पञ्चदेवल विनायक नगरपालिकाका नगर प्रमुख अम्बिका चलाउने तथा नगरपालिकाका स्वास्थ्य शाखा प्रमुख जनक बहादुर बुढाले पूर्ण खोप सुनिश्चितता पालिका घोषणा गरे ।

उत्साह र उमङ्गका साथ काम गरेकोले पूर्ण खोप बनाउन सकिएको र यसलाई निरन्तरता पाउनु ठुलो विषय भएकोले आगामी दिनमा पनि अभियानकै रूपमा सञ्चालन गर्न आवश्यक रहेको नगर प्रमुख चलाउनेको भनाई छ । 

सबै वडालाई पूर्ण खोप सुनिश्चितता घोषणा गरिएको र हाल सोही तथ्याङ्क र सूचकका आधारमा पूर्ण खोप सुनिश्चितता नगरपालिका घोषणा गरिएको स्वास्थ्य शाखा प्रमुख जनक बुढाले बताए ।

उनका अनुसार राष्ट्रिय खोप तालिका अनुसार नगरका ९ वटै वडाका खोप लगाउने उमेर समूहका बालबालिकाले खोप लगाएको सुनिश्चित गरिएपछि पूर्ण खोपयुक्त सुनिश्चित पालिका घोषणा गरिएको हो ।

नगरपालिकाभर ०–५९ महिना उमेर समूहका २ हजार चार सय ८ जना बालबालिका रहेको मा सबै बालबालिकालाई पूर्ण खोप लगाइएको शाखा संयोजक बुढाले जानकारी दिए ।