पुजा शाही, अछाम / मंगलसेन नगरपालिकाका सबै वडामा राष्ट्रिय स्वतन्त्र पार्टी (रास्वपा) का वडा भेला हुने भएका छन् । रास्वपा मंगलसेन नगर समितिले यही असोज २५ गतेदेखि कात्तिक ९ गतेसम्म नगरपालिकाका सबै वडामा भेला तथा शुभकामना आदानप्रदान कार्यक्रम गर्ने निर्णय गरेको हो ।

सोमबार मंगलसेनमा बसेको नगर समितिको बैठक तथा छलफल कार्यक्रममार्फत् संगठन विस्तारको काम वडाबाट सुरु गर्ने निर्णय गरिएको छ । नगर सभापती राजेशबाबु बोगटीको सभापतित्वमा बसेको बैठकले वडा भेलाका लागि मिति र स्थान समेत तय गरेको छ ।

जस अनुसार यही असोज २५ गते नगरपालिकाको वडा नम्बर ३ बाट सुरु भएको संगठन विस्तार र सुदृढीकरणको अभियान कात्तिक ९ गते वडा नम्बर ९ र १० को जुपुमा गएर समापन हुनेछ । कार्यसूची अनुसार असोज २६ गते वडा नम्बर ४, २७ गते वडा नम्बर ५, २८ गते वडा नम्बर १३ को बस्ती, २९ गते वडा नम्बर १३ कै बाडा र ३० गते वडा नम्बर १ र २ मा वडा भेला हुनेछ ।

यसैगरी आगामी कात्तिक ५ गते वडा नम्बर ८ र ९, कात्तिक ६ गते वडा नम्बर ६ र ७, कात्तिक ७ गते वडा नम्बर १४ कालागाउँ र कात्तिक ८ गते वडा नम्बर १२ बान्नातोलीमा वडा भेला तथा शुभकामना आदान कार्यक्रम गर्ने कार्यक्रम निर्धारण गरिएको रास्वपा नगर समितिले जानकारी दिएको छ ।

निर्वाचन आयोगले आगामी फागुनमा स्थानीय तहको निर्माचन गर्ने तयारी गरेको छ । सोही अनुरुप राष्ट्रिय स्वतन्त्र पार्टी मंगलसेन पनि दशैतिहारको मुखमा संगठन निर्माण, विस्तार र सुदृढिकरणमा सक्रिय देखिएको हो ।