अछाम – आज साउनको पहिलो सोमबारको दिन सुदूर तथा देशका विभिन्न शिवालयहरुमा पुजाअर्चनाका लागि भक्तजनहरु पुगेका छन् । हिन्दू परम्परा अनुसार साउन महिना शिवको प्रिय महिनाको रुपमा लिइन्छ ।

श्रावण महिनाका सोमबार हिन्दू महिलाहरु व्रत बस्ने गर्दछन् । साउने सोमबारका दिन व्रत बसी शिवजीको पूजा अराधना गर्दा मनोकांक्षा पूरा हुन्छ भन्ने धार्मिक विश्वास छ ।

सोही अनुरुप देशका विभिन्न चार धाम मध्येको एक अछामको बैजनाध धाममा पनि गत बर्षको जस्तो भक्तजनहरुको भिड नभएपनि छिटफुट रुपमा देखिएका छन् । कोरोनाको संत्रास कायम रहेकाले पनि भक्तजनहरुको खासै भिड नदेखिएको बैद्यनाथका पुजारीको भनाई छ ।

बैजनाधमा बिहान केही समय भिडभाड देखिए पनी पछी फाट्टफुट्ट दर्शनार्थी आउने जाने भइरहेका छन । सरकारले २५ जना भन्दा बढी एक स्थानमा भेला नहुन भनेकाले अन्य शिव मन्दिरहरु पनि प्रायः बन्द रहेका छन ।

साउने सोमबार शिवजीको पूजा उपासना गर्नाले आफू र आफ्नो परिवारको सुस्वास्थ्य, दीर्घायु तथा घर परिवारमा सुख शान्ति छाउने विश्वास पनि रहिआएको छ ।