दार्चुला । नेपाल–भारतका अधिकारीबीचको सीमा समन्वय बैठक सम्पन्न भएको छ । जिल्ला प्रशासन कार्यालय दार्चुलाको आयोजनामा दार्चुला, बैतडी र भारतको पिथौरागढका अधिकारीबीचको बैठक सम्पन्न भएको हो । 

कोरोना महामारीलाई दृष्टिगत गरेर भर्चुअल माध्यमबाट बैठकको आयोजना गरिएको थियो । बैठकमा नेपालको तर्फबाट मुख्य चार वटा एजेण्डाहरु राखिएको दार्चुलाका प्रमुख जिल्ला अधिकारी दीर्घराज उपाध्यायले बताए । 

उनका अनुसार नेपालले सीमा बैठकमा भारतले दुई देशीय सहमति र अन्तर्राष्ट्रिय मान्यता विपरित दार्चुला सदरमुकाम खलंगापारि धार्चुला क्षेत्रमा निर्माण गरिरहेको पक्की तटबन्ध, नेपाल–भारत जोड्ने मोटरेवल पुल, भारतीय बजारमा नेपाली मुद्राको अवमूल्यन र सीमा पुलहरु खोल्ने विषयमा नेपालको तर्फबाट एजेण्डा राखिएको छ ।

भारतीय पक्षले भने १४ फेब्रअरीमा हुने विधानसभा निर्वाचनको सीमा सुरक्षा व्यवस्थाप, सीमा समन्वयलगायत विषयमा एजेण्डा राखेको थियो ।