अछाम : अछामका उद्यमी महिलाहरुको साझा संस्था महिला उद्यमी संघ नेपालको साधारणसभा आज सम्पन्न भएको छ ।

अध्यक्ष तिलसरा विष्टको अध्यक्षतामा भएको सभाको प्रमुख अतिथि पञ्चदेवल विनायक नगरपालिकाका नगर प्रमुख अम्बिका चलाउने रहेकी थिइन् भने विशिष्ट अतिथि कमलबजार नगरपालिका नगर उपप्रमुख शारदा विष्ट कुँवर र निवर्तमान उपप्रमुख भूमिशरण बजगाई रहेकी थिइन् ।

साधारण सभाबाट इन्दिरा रेग्मीको अध्यक्षतामा १५ सदस्यीय जिल्ला कार्यसमिति गठन गरिएको छ । जिल्लाका विभिन्न सामाजिक गतिविधिमा लामो समयदेखि क्रियाशील सामाजिक अभियन्ता एवम् उद्यमी रेग्मीको नेतृत्वमा गठित यस समितिमा जिल्लाको मंगलसेन, साँफेबगर, कमलबजार लगायतका व्यापारिक क्षेत्रबाट सदस्यहरु निर्वाचित भएका छन् ।

समितिको उपाध्यक्षमा तारा कडायत, सचिव राधा आचार्य ढकाल, कोषाध्यक्ष शान्ति रोकाय सहित मंगलसेन नगरपालिकाबाट ५ जना सदस्य, कमलबजार नगरपालिकाबाट २ जना सदस्य र साँफेबगर नगरपालिकाबाट १ जना सदस्य गरी जम्मा १५ जनाको कार्यसमिति गठन गरिएको हो ।

साधारण सभाको उदघाटन सत्रमा बोल्दै प्रमुख अतिथि पञ्चदेवल विनायक नगरपालिका नगर प्रमुख अम्बिका चलाउनेले उद्यमी महिलाको हक, हित र उत्थानका लागि आफू जहिल्यै अग्रपंक्तिमा सहकार्य गर्ने बताइन् । विशिष्ट अतिथि कमलबजार नगरपालिका उपप्रमुख शारदा विष्ट कुँवरले अछामी महिलाको सशक्त क्षेत्रको उत्थानमा होस्टेमा हैसे गर्न तयार रहेको अभिव्यक्ति दिइन् ।

विशिष्ट अतिथिकै आसनबाट कमलबजार नगरपालिकाकी निवर्तमान उपप्रमुख भूमिशरण बजगाईले यो संस्था महिला उद्यमीहरुको साझा अग्रणी संस्था भएकोले सबै सम्बद्ध महिला दिदीबहिनीले संगठित हुनुपर्नेमा जोड दिइन ।

कार्यक्रममा नेपाली काँग्रेस महासमिति सदस्य अञ्जु मल्ल, नेकपा एकीकृत समाजवादीका जिल्ला सचिवालय सदस्य कमल अधिकारी, नेकपा जिल्ला सचिव सज्जन सि सहित विभिन्न क्षेत्रका सरोकारवालाहरुको सहभागिता रहेको थियोे ।