जाजरकोट ः जाजरकोट जिल्ला अस्पतालमा निशुल्क हाडजोर्नी शिबिर सुरु भएको छ । बुधबार एक औपचारिक कार्यक्रम गरेर शिबिर सुरु भएको हो । भेरी नगरपालिकाका नगर प्रमुख चन्द्र प्रकाश घर्तीको अध्यक्षतामा भएको शिबिर उद्दघाटन कार्यक्रममा जिल्ला समन्वय समितिका प्रमुख कालि बहादुर खत्री प्रमुख अथिति रहेका थिए । प्रमुख अथिति खत्रीले शिबिरले यस क्षेत्रका जनतलाई ठुलो राहत हुने बिश्वास व्यक्त गरे ।

कार्यक्रममा प्रमुख जिल्ला अधिकारी ऋषिराज आचार्यले शिबिरले यस क्षेत्रमा पैसाको अभावमा उपचार हुन नपाएका हाडजोर्नीका बिरामीलाई मलहम पट्टी लगाउने काम हुने बताए । शिबिरको सफलतापूर्वक सम्पन्न गर्न आवश्यक समन्वय तथा सहजिकरण गर्न प्रहरी प्रशासनका साथै समग्र जिल्ला नैर तयार रहेको प्रतिवद्धता व्यक्त गरे ।

यस्तै कार्यक्रमका अध्यक्ष तथा नगर प्रमुख चन्द्र प्रकाश घर्तीले २ महिना पहिले देखि नै न्याय हेल्थ नेपाल बयालपाटा अस्पताल संग समन्वय भएर शिबिर सुरु भएको र यसले यस नगरका मात्र नभई जिल्ला भरीका नागरिकलाई ठुलो राहत हुने बताए । साथै उनले शिबिरको लागि आवश्यक समन्वय सहजिकरण तथा सहयोग गर्न नगरपालिका तत्पर रहेको बताए ।

जिल्ला समन्वयप प्रमुख र प्रमुख जिल्ला अधिकारीले बिरामीलाई पुर्जा दिएर शिबिर सुरु भएको घोषणा गरेका थिए भने उद्घाटन कार्यक्रममा शिबिरको उद्देश्यका बारेमा बयालपाटा अस्पतालमा मेडिकल तथा शल्यचिकित्सा निर्देशक डाक्टर मन्दिप पाठकले जानकारी गराएका थिए । उद्दघाटन कार्यक्रमको सञ्चालन भेरी नगरपालिकाका स्वास्थ्य शाखाका प्रमुख दिपक वलिले गरेका थिए ।

न्याय हेल्थ नेपाल बयालपाटा अस्पताल अछामको आयोजना तथा भेरी नगरपालिका र जाजरकोट स्वास्थ्य सेवा कार्यालयको समन्वयमा सुरु भएको शिबिरमा गिभ टु एसिया अष्टेलियाको आर्थिक सहयोग रहेको छ । शिबिर १८ गते सम्म सञ्चालन हुने छ ।