काठमाडौं । इङ्गल्याण्ड १६ औं संस्करणको युरोकप फुटबलको सेमिफाइनलमा प्रवेश गरेको छ । इटालीको रोमस्थित स्टाडियो ओलम्पिको स्टेडियममा  शनिबार राति भएको क्वार्टरफाइनलमा युक्रेनमाथि शानदार जित हासिल गर्दै इङ्गल्याण्ड अन्तिम चारमा पुग्न सफल भएको हो । 

खेलमा युक्रेन ४–० गोल अन्तरले पराजित भयो । इङ्गल्याण्डलाई जित दिलाउन कप्तान ह्यारी केनले दुई गोल गरे । त्यस्तै ह्यारी मग्वाएर र जोर्डन हेण्डरसनले एक एक गोल गरे ।

चौंथो मिनेटमा केनले गोल गर्दै गोलको खाता खोले । पहिलो हाफ १–० को नतिजामा सकिएकामा दोस्रो हाफमा भने इङ्गल्याण्ड थप हाबी भयो ।

४६ औं मिनेटमा डिफेन्डर मग्वाएरले गोल गर्दै इङ्गल्याण्डलाई २–० को अग्रता दिलाए । खेलको ५० औं मिनेटमा केनले व्यक्तिगत दोस्रो गोल गर्दै इङ्गल्याण्डको अग्रता तेब्बर बनाए । 

६३ औं मिनेटमा हेण्डरसनले गोल गर्दै इंग्ल्यान्डलाई ४–० को फराकिलो जित दिलाए ।

यो शानदार जितसँगै इङ्गल्याण्ड २५ वर्षपछि पहिलो पटक युरोकपको सेमिफाइनलमा प्रवेश गरेको छ ।  यसअघि इङ्गल्याण्ड सन् १९९६ मा सेमिफाइनल पुगेयता कमजोर प्रदर्शन गर्दै आएको थियो । 

पहिलो उपाधि यात्रामा रहेको इङ्गल्याण्डले सेमिफाइनलमा डेनमार्कसँग खेल्नेछ । चेक गणतन्त्रलाई २–१ गोल अन्तरले पराजित गर्दै डेनमार्क सेमिफाइनलमा पुगेको हो ।