अछाम, तुर्माखाँद, २०८२ कार्तिक २५ गते — गाउँमै व्यवसायिक बाख्रापालन गर्दै आएका किसान नन्दाराम बुढाको फार्ममा अज्ञात रोग देखिएपछि करिब २५ बाख्राका पाठापाठी मरेका छन्। जीवित बाख्रामा पनि रोगका लक्षण देखिएको भन्दै उहाँ चिन्तित हुनुहुन्छ।

तुर्माखाँद गाउँपालिका–१, रहफका नन्दाराम बुढाले आत्मनिर्भर बन्ने र गाउँमै व्यवसायिक अवसर सिर्जना गर्ने उद्देश्यले “हिमानी बाख्रा फार्म” सञ्चालन गर्दै आउनुभएको थियो। करिब १२० वटा बाख्रा पालन गर्दै आएका उहाँका लागि हालैको रोगको प्रकोप ठूलो चुनौती बनेको छ।

गाउँपालिकामा सहयोगको लागि पुगेका बुढाका अनुसार, रोगको सही पहिचान स्थानीय स्तरमा गर्न कठिन भएको छ। गाउँपालिका नायब प्राविधिक सहायक प्रेमबहादुर बि.सीले बताएअनुसार, जिल्लामा वा स्थानीय प्रयोगशालामा परीक्षण नहुँदा अज्ञात रोगको पहिचान हुन नसकेको हो। यस विषयमा प्रदेश सरकार र विशेषज्ञ टोलीलाई जानकारी गराइसकिएको छ।

विशेषज्ञहरूले तुरुन्तै रोगको पहिचान र नियन्त्रणका उपाय खोज्नुपर्ने बताइरहेका छन्। यस घटनाले दुर्गम क्षेत्रमा पशु स्वास्थ्य सेवा, कृषि प्रयोगशालाको आवश्यकता र किसानको मनोबल संरक्षणको महत्व उजागर गरेको छ।

नन्दाराम जस्ता किसानहरूले गाउँमै बसेर कृषि क्षेत्रमा क्रान्ति ल्याउने सपना देखेका छन्। यस्ता चुनौतीको सामना गर्न स्थानीय र प्रदेश सरकारको तत्काल सहयोग आवश्यक रहेको देखिएको छ।