काठमाडौं । नेपाली कांग्रेसका नेता एवं पूर्वसञ्चारमन्त्री मीनेन्द्र रिजालले प्रेस स्वतन्त्रतालाई संकुचन गरेर समृद्धिको यात्रा अघि बढ्न नसक्ने बताएका छन् । 

विश्व प्रेस स्वतन्त्रता दिवसका अवसरमा नेपाल प्रेस युनियन काठमाडौंले आयोजना गरेको ‘नेपालमा प्रेस स्वतन्त्रताको अवस्था र चुनौती’ विषयक डिजिटल संवादमा नेता रिजालले प्रेस स्वतन्त्रतालाई संकुचन गर्न नहुने भन्दै यस्तो बताएका हुन् । “सञ्चार जगतको स्वतन्त्रतालाई संकुचन गर्न पाइँदैन । सञ्चारगृह जति जिम्मेवार हुन्छन्, त्यसलाई संकुचन गर्न चाहने मानिसहरु त्यति कमजोर भएर जान्छन्,” नेता रिजालले भने, “अहिले विश्वभरि नै प्रेस स्वतन्त्रतालाई संकुचन गर्ने ट्रेन्ड छ । संकुचन गर्ने हो भने प्रजातन्त्र पनि कमजोर हुन्छ । समृद्धिको यात्रा पनि अघि बढ्न सक्दैन ।”

त्यस्तै उनले नेपालमा कम्युनिस्ट पार्टीको सरकार हुँदा आफुलाई मन नपरेको कुरा छापिना साथ सीधै तीमाथि आक्रमण गर्ने गरेको पनि बताए । अहिले आफ्नाविरुद्ध लेख्ने, बोल्नेलाई कारबाही गर्न थालिएको भन्दै कम्युनिस्ट स्कुलिङबाट आएकाहरुमा आलोचना सहने क्षमतै नभएको पनि बताए । प्रेसले आफूलाई मन नपरेको कुरा लेखे पनि त्यसलाई सहज रुपमा स्विकार्नुपर्ने बताए । 

आफू सञ्चारमन्त्री हुँदा मधेसमा रेडियो बन्द गर्न र केही अनलाइन बन्द गरिदिनुपर्‍यो भनेर दबाब आए पनि आफूले त्यसो नगरेको स्मरण गरे । – baarahkhari