नेपाली कांग्रेसका युवा नेता रामप्रसाद भाटले पार्टीको महाधिवेशन प्रतिनिधिमा आफ्नो उम्मेदवारी रहने घोषणा गर्नुभएको छ।

अछाम क्षेत्र नं. २ बाट समग्र युवाको प्रतिनिधित्व गर्दै महाधिवेशन प्रतिनिधिमा उम्मेदवारी दिने उहाँले सामाजिक सञ्जालमार्फत जानकारी गराउनुभएको हो ।

आगामी असोज १८ गते हुने नेपाली कांग्रेसको केन्द्रीय महाधिवेशनका लागि महाधिवेशन प्रतिनिधिमा आफ्नो उम्मेदवारी रहने बताउँदै भाटले पार्टीका नेता, कार्यकर्ता तथा प्रतिनिधिहरूलाई सहयोग र समर्थनका लागि आग्रह गर्नुभएको छ ।

अछाम क्षेत्र नं. २ को क्षेत्रीय अधिवेशन असोज १० गते हुने भएकाले आफू अहिले क्षेत्रीय अधिवेशनको तयारीमा केन्द्रित रहेको भाटले बताउनुभएको छ । उहाँले क्षेत्रीय प्रतिनिधिहरूलाई आफूलाई मतदान गरी महाधिवेशन प्रतिनिधिका रूपमा निर्वाचित गराउन आग्रहसमेत गर्नुभएको छ ।

नेपाली कांग्रेसमा सक्रिय युवा नेताका रूपमा परिचित भाटले पार्टी संगठनसँगै जिल्लाका विभिन्न सामाजिक तथा समसामयिक सवालमा समेत आवाज उठाउँदै आउनुभएको छ । युवाको सहभागिता, नेतृत्व विकास र पार्टी संगठनलाई थप सक्रिय बनाउने विषयमा आफू निरन्तर क्रियाशील रहेको उहाँको भनाइ छ । युवा नेता भाट खेलकुद क्षेत्रमापनि उतिकै सकृय हुनुहुन्छ ।

उहा अहिले जिल्ला खेलकुद समितिको जिल्ला उपाध्यक्षको रुपमा समेत कार्यरत हुनुहुन्छ । महाधिवेशन प्रतिनिधिमा आफ्नो उम्मेदवारीलाई युवाको प्रतिनिधित्वसँग जोड्दै भाटले पार्टीप्रतिको आफ्नो प्रतिबद्धता, सक्रियता र इमानदारीलाई आधार बनाएर आफूलाई अवसर दिन क्षेत्रीय प्रतिनिधिहरूसमक्ष आग्रह गर्नुभएको ।

क्षेत्रीय अधिवेशन नजिकिँदै जाँदा अछाम क्षेत्र नं. २ मा महाधिवेशन प्रतिनिधिका आकांक्षीहरूबीच आन्तरिक प्रतिस्पर्धा पनि बढ्दै गएको छ। यहीबीच युवा नेता भाटको उम्मेदवारी घोषणालाई युवापंक्तिको प्रतिनिधित्वका रूपमा हेरिएको छ ।