मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

एमाले रोजेका १४ जनप्रतिनिधिलाई पदमुक्त गर्न माग गर्दै निर्वाचन आयोगमा माओवादीकाे पत्र

एमाले रोजेका १४ जनप्रतिनिधिलाई पदमुक्त गर्न माग गर्दै निर्वाचन आयोगमा माओवादीकाे पत्र

सुदूर आज

काठमाण्डाै – माओवादी केन्द्रले नेकपा विभाजनपछि एमाले रोजेका पालिकाका जनप्रतिनिधिको पद रिक्त गराउन निर्वाचन आयोगमा पत्र बुझाएको छ । एमाले राेजेका माओवादी पृष्ठभूमिका पालिकाका १४ जनप्रतिनिधिलाई पदमुक्त गराउन माओवादी केन्द्रले विवरणसहित पत्र आयोगमा बुझाएको हो ।

साेमवार बिहान बसेको केन्द्रीय कमिटी बैठकको निर्णयको माइन्युटसहित माओवादी केन्द्रले दुई नगरपालिकाका मेयर, गाउँपालिका अध्यक्षसहित विभिन्न जिल्लाका वडाध्यक्ष र सदस्यको पद रिक्त गराउन कारबाहीको पत्र बुझाएको छ ।

यसअघि पार्टी त्याग गरेकालाई कारबाही गर्ने निर्णयको अधिकार अध्यक्ष पुष्पकमल दाहाल प्रचण्डलाई दिइएको थियो । माओवादी केन्द्रले यसअघि पनि निर्वाचन आयोगमा कारबाहीबारे जानकारी गराएको भए पनि आयोगले केन्द्रीय कमिटीकाे बैठकले कारबाहीको निर्णय नभएको भन्दै पार्टी परित्याग गरेको सूचना जारी गरेको थिएन ।

पार्टीबाट हटाइएका नेताकाबारेमा दल त्यागको सूचना निर्वाचन आयोगले प्रकाशित नगरेको भन्दै हिजो माओवादी केन्द्रका नेताहरू आयोगमा पुगेर ध्यानाकर्षण गराएका थिए ।