काठमाडौं । उम्मेदवारी मनोनयनमा देशभर स्वतन्त्र उमेद्वारहरुको संख्या सबैभन्दा बढी देखिएको छ । त्यसपछि नेपाल कम्यूनिष्ट पार्टी (एमाले)ले सबैभन्दा बढी ठाउँमा मनोनयन दर्ता गराएको देखिन्छ ।

अनलाइनखबरले संकलन गरेको प्रारम्भिक तथ्यांक अनुसार, धेरैजसो पदमा स्वतन्त्र उम्मेदवारहरुको संख्या बढी छ । दलगत रुपमा एमालेको मनोनयन बढी देखिएको छ ।

नगर प्रमुख (मेयर) पदमा ८८५ उम्मेदवारी दर्ता हुदा एमालेले २३३ उम्मेदवारी दर्ता गरेको छ भने कांग्रेसले १९४ ठाउँमा मात्रै मनोनयन दर्ता गराएको छ । राष्ट्रिय प्रजातन्त्र पार्टीको १८७ ठाउँमा मनोनयन परेको छ ।

गाँउपालिकाहरुको अध्यक्ष पदमा पनि स्वतन्त्र उम्मेदवारहरुको मनोनयन नै हाबी छ । ७४२ ठाउँमा अध्यक्षका लागि उम्मेदवारी दर्ता भएको छ ।

त्यसपछि एमालेले ३७५ ठाउँमा उम्मेदवारी दिएको छ । कांग्रेसले २९९ ठाउँमा मनोनयन दर्ता गरेको छ । राप्रपाको संख्या २१६ छ ।

उपमेयर पदमा २८२ स्वतन्त्र उम्मेदवारी परेको छ । त्यसपछि एमालेले २२१ ठाउँमा उम्मेदवारी दर्ता गरेको छ । राप्रपाले १६० र कांग्रेसले १४१ ठाउँमा मनोनयन दर्ता गरेको देखिन्छ ।

उपाध्यक्ष पदमा एमालेको मनोनयन सबैभन्दा बढी छ । उसले ३६४ ठाउँमा मनोनयनपत्र दर्ता गराएको छ । स्वतन्त्र उम्मेदवारहरुले २६४ ठाउँमा मनोनयन दर्ता गराएका छन् ।

त्यसपछि कांग्रेसले २६२ ठाउँमा उम्मेदवारी दिएको देखिन्छ भने माओवादी केन्द्रले २२० ठाउँमा उम्मेदवारी दिएका छन् ।

वडाध्यक्षमा समेत एमालेको मनोनयन अगाडी देखिएको छ । उसले ४ हजार ३५६ ठाउँमा मनोनयन दर्ता गर्दा स्वतन्त्र उम्मेदवारहरुले ३ हजार ८७४ ठाउँमा उम्मेदवारी दिएका छन् । कांग्रेसले ३ हजार २५८ ठाउँमा उम्मेदवारी दिएको छ । माओवादी केन्द्रले २ हजार २०४ ठाउँमा दर्ता गराएको देखिन्छ ।

‘अरु दलहरुले तालमेलमा मनोनयन दर्ता गरेका छन्, त्यसको तुलनामा एमालेले सबैतिर उम्मेदवारी दिएकाले संख्या बढी देखिएको हो,’ मनोनयनपत्र दर्ताको तथ्यांक विश्लेषण गरिरहेको निर्वाचन आयोग स्रोतले भन्यो, ‘सोमबार दिउँसो २ बजेपछि धेरै ठाउँमा चाप परेकाले अहिले आएको प्रारम्भिक विवरण मात्रै हो । त्यो अद्यावधिक हुने क्रममा छ ।’