रमेश रावत, अछाम –

जिल्लाको पन्चदेवल बिनायक नगरपालिका ४ कालिकास्थानमा बेवारिसे अवस्थामा फेला परेको चितुवाको बच्चालाई जङ्गलमै छोडिएको छ । आईतवार बेलुकी स्थानिय जीवन साउदको घरमा नजिकै फेलापरेको चितुवाको बच्चालाई अस्थायी प्रहरी पोस्ट बेलखेतको सहयोगमा डिभिजन बन कार्यालय बिनायकमा बुझाइएको हो ।

“बेलुकी पाँच बजेतिर साउदजीको घरमा बाघको बच्चा भेटियो भनेपछि हामी गएका हौ” अस्थायी प्रहरी पोस्ट बेलखेतका ईन्चार्ज प्रहरी सहायक निरीक्षक रमेश नाथले भने “हामी पुगेपछि बन कार्यलयलाई जानकारी गरायौ” ।

अन्दाजी एक महिनाको चितुवाको बच्चालाई सोमबार स्थानिय जनप्रतिनिधि, प्रहरी,प्रशासन र पत्रकारको रोहबरमा फेलापरेको ठाउँ नजिकैको कालिका सामुदायिक बनमा छोडिएको छ ।

४४ सेन्टिमिटर लम्बाइ, १६ सेन्टिमिटर उचाई र डेढ किलो तौल भएको चितुवाको बच्चालाई पुनः जङ्गलमै छोडिएको डिभिजन बन कार्यालय बिनायकका फरेस्टर चन्द्रकान्त उपाध्यायले जानकारी दिए ।

कालिका सामुदायिक बनमा बिगत देखि चितुवा देखिने गरेको उक्त बनका सचिब गोपाल बिष्टको भनाई छ । जङ्गलमा चितुवाको बच्चा देखिएपछी स्थानीयहरुलाई जङ्गलमा जादा सतर्कता अपनाउन प्रहरीले आग्रह गरेको छ ।